الأسبوع اللي فات ركبت الفيسبا الطائرة بتاعتي وحاولت أسبق الزمن…
الجدع ده تعبني وزهقني
كل شوية يقولي: اصبر
كل شوية يقولي: لسه
أقوله: زهقت
يقولي: بص قدامك
أقوله: لحد إمتى؟
يقولي: مش محتاج تستنى
فزهقت منه وقلت: مبدهاش
بلا سرعة ضوء، بلا سرعة صوت
وركبت الفيسبا
ودخلت معاه السباق
وأنا طاير شفت بيت حلو
شفت شجرة كبيرة
شفت وردة زرقا
أول مرة أشوف وردة زرقا عالحقيقة
إيه ده… حلو أوي الشباك ده!

المهم…

رجعت أركز في السباق
لازم أسبق الزمن
بس الصراحة بقالنا كتير
ومش عارف أسبقه
قلتله: تشرب شاي؟

روحنا قهوة جنبنا وطلبنا ٢ شاي
وقرر يقولي حكمة وأنا بفكر أسبقه وأقوم قبل منه
قالي: «إنت خايف من المجهول
ومتمسك بمعلوم مليان نعم
واللي خلق الاتنين واحد»
ولأول مرة أحب المجهول أكتر من المعلوم
ولأول مرة أشرب شاي مع الزمن.